शुक्रबार राति वीरेन्द्रनगर–२ मुलपानीबाट भुरेलीतर्फ जाँदै गर्दा भएको सो दुर्घटनामा आचार्य गम्भीर घाइते भएका थिए। उनलाई तत्काल उपचारका लागि अस्पताल लगिएको भए पनि चिकित्सकले मृत घोषणा गरेका थिए।
प्रत्यक्षदर्शीका विवरण र प्रारम्भिक प्रहरी अनुसन्धानअनुसार, मुलपानीतर्फबाट भुरेली जाँदै गरेका आचार्य चढेको स्कुटर र विपरीत दिशाबाट आइरहेको यामबहादुर शाहीले संचालन गरेको मोटरसाइकल आपसमा ठोक्किएका थिए।
दुर्घटनामा मोटरसाइकल चालक शाहीको पनि टाउको र शरीरका विभिन्न भागमा चोट लागेको छ। उनको अवस्था मध्यम रहेको प्रहरीको प्रारम्भिक विवरण छ।
आचार्यको मृत्युपछि घटनालाई शंकास्पद भन्दै आफन्त तथा स्थानीयले शनिबार बिहानैदेखि वीरेन्द्रनगरका विभिन्न स्थानमा विरोध प्रदर्शन सुरु गरेका छन्।
मुलपानी चोक, एरिचोक लगायतका क्षेत्रमा प्रदर्शनकारीले टायर बालेर सडक अवरुद्ध गरेपछि सवारी आवागमन केही घण्टा प्रभावित रह्यो।
आचार्यका आफन्तले दुर्घटनास्थलमै प्रहरीले मुचुल्का नउठाई पानी खन्याएर प्रमाण नष्ट गर्न खोजेको दाबी गरेका छन्।उनहरूको आरोप अनुसार, रातारात काम गरिएको शैलीले नै घटनालाई अझै शंकास्पद बनाएको छ।
आफन्त तथा स्थानीयले निष्पक्ष छानबिन गर्दै वास्तविक दोषी पहिचान गर्न, घटनास्थलको प्रमाण संरक्षणबारे जवाफदेही माग्दै निरन्तर दबाब दिइरहेका छन्।
प्रहरीले भने विस्तृत अनुसन्धान भइरहेको र आवश्यक विधिसम्मत प्रक्रिया अघि बढाइने प्रतिक्रिया दिएको छ।
